المقالات

5 طرق نقدر نستفيد بيها من بواقي الاكل

5 طرق نقدر نستفيد بيها من بواقي الاكل

كل مرة بندخل المطبخ و عشان نطلع اي طبخة حلوة بيكون في دايما بواقي من الاكل الي نقشره و لو الوصفة مثلا بتحتاج نصف ليمونة بيكون عندنا نصف تاني مش بنعرف نعمل بيه ايه و بنرميه، و عشان كدا قررنا نكلمكم عن ازاي نقدر نستخدم بواقي الاكل الي بتكون عند اغلبنا و نعمل بيها حاجات احلي.

١- قشر البطاطس

كلنا بنحب البطاطس في كل اشكالها و بنعملها بكذا طريقة و كل طريقة فيهم بتسيبلنا قشر كتير و بنضطر اننا نرميه بس احنا هنعرفكم ازاي تعملوا منه حاجة هتحبوها.

  • هنغسل القشر كويس و نحطه في صينية
  • هنحط عليه شوية زيت زيتون و التوابل الي بنحبها
  • هندخله الفرن علي درجة حرارة ٢٠٠ و نسيبه من ١٠ دقايق لربع ساعة

و بكدا هيكون عندنا chips مقرمشة نقدر ناخدها كسناك مع الاكل او بعدين واحنا بنشوف مسلسل

٢- بواقي الخضار

دايما بيكون عندنا بواقي من الخضار في اي طبخة لو احتاجت نص ليمونة مثلا او نص حباية فلفل و بنرمي النص التاني او نحطه في التلاجة و بيبوظ، الخضار ده مع اي خضار تاني في التلاجة مش بنستخدمه او قربنا نرميه ممكن نرميه كله في الخلاط و نضربهم و هيطلعلنا صوصات مختلفة للمكرونة و كل ما تغير في الخضار هيطلعلك صوص مختلف 😉

٣- العيش الناشف

كا البيوت في مصر مرتبطة بشدة بالعيش من بداية خلقه لدرجة انه لو قل بتحصل ازمة في البيت و مع ذلك دائما بنسيب منه اجزاء و بتنشف و بنرميها. العيش ده بدل ما يترمي نقدر نحطه في الخلاط و نضربهم لحد ما يبقى ناعم شوية و بكدا هيبقي عندنا زي البقسماط المطحون نقدر نغطي بيه البانيه او اي اكلة تانية. و ممكن كمان نسيب فيه حتت كبيرة شوية عشان يبقى مقرمش.

٤- قشر التفاح

قشر التفاح كمان نقدر نغليه مع المياه الساخنة و نخلي الشاي بتاعنا ياخد طعمه او نعمل بيه هوت سيدر مثلا. او ممكن دخله الفرن زي البطاطس و ناكله مقرمش.

٥- بواقي الاجبان

في مننا كتير بيحبوا الجبنة باشكالها و الوانها و انواعها و متأكدين من انهم هيحبوا الطريقة ديه. حطوا بواقي الجبنة الي عندكم في لبن علي درجة حرارة قليلة و سيبوها لحد ما تسيح و حطوا عليهم توابل و بكدا هيطلع معاكوا صوص جبنة للسندوتشات او للبطاطس. و كل ما تغير في الجبنة هتغير في الطعم طبعا

You may also like...

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *